Мадэлі груп кароткачасовага знаходжання
Ва ўстановах дашкольнай адукацыі могуць функцыянаваць розныя мадэлі груп кароткачасовага знаходжання (дыферэнцыруюцца па месцы размяшчэння групы, напрамках прыярытэтнай дзейнасці, узросце выхаванцаў) у залежнасці ад запытаў бацькоў (законных прадстаўнікоў) выхаванцаў і рэсурсных магчымасцей установы адукацыі.
Адаптацыйныя групы арганізуюцца з мэтай адаптацыі дзяцей ранняга ўзросту (да 3 гадоў) да ўстановы адукацыі, падтрымкі іх бацькоў (законных прадстаўнікоў) у перыяд прывыкання выхаванцаў да новага асяроддзя і ролі раўнапраўных членаў групы аднагодкаў. Могуць функцыянаваць у спецыяльна абсталяваным памяшканні ўстановы адукацыі.
У адаптацыйнай групе прадугледжваецца як сумеснае знаходжанне дзяцей і іх бацькоў (законных прадстаўнікоў), так і знаходжанне толькі дзяцей. Гэтая мадэль прадугледжвае, што выхаванцы ў далейшым могуць быць прыняты ў адпаведную ўзроставую групу ўстановы адукацыі на пастаяннай аснове.
Групы "Мацярынская школа" ствараюцца з мэтай рознабаковага развіцця выхаванцаў ад нараджэння да трох гадоў і аказання іх бацькам (законным прадстаўнікам) мэтанакіраванай, сістэматычнай дапамогі ў пытаннях выхавання дзяцей ранняга ўзросту. Групы функцыянуюць у спецыяльна абсталяваным памяшканні ўстановы адукацыі і прадугледжваюць сумеснае знаходжанне бацькоў (законных прадстаўнікоў) і дзяцей ва ўмовах устаноў адукацыі і (або) сістэматычнае наведванне педагагічнымі работнікамі сем'яў выхаванцаў з мэтай аказання дапамогі бацькам (законным прадстаўнікам) у іх выхаванні, навучанні і развіцці.
Прагулачныя групы прадугледжваюць знаходжанне дзяцей ранняга і дашкольнага ўзросту ў узроставай групе, якая функцыянуе на пастаяннай аснове, уключэнне іх у адукацыйны працэс на перыяд правядзення прагулкі (у першую і (або) другую палову дня). У названых групах згодна з распарадкам дня і з улікам узросту выхаванцаў арганізуюцца розныя віды дзіцячай дзейнасці (пазнавальная практычная (назіранні, вопыты і даследаванні, экскурсіі, мэтавыя прагулкі і інш.), гульнявая (дыдактычныя, сюжэтна-ролевыя гульні і інш.), працоўная ( праца ў прыродзе, гаспадарча-бытавая праца), ажыццяўляецца фізкультурна-аздараўленчая дзейнасць (рухомыя гульні і фізічныя практыкаванні, самастойная рухальная дзейнасць і інш.), праводзіцца індывідуальная работа з дзецьмі па адукацыйных абласцях вучэбнай праграмы дашкольнай адукацыі і інш.
Групы выхаднога дня, вячэрнія групы ствараюцца з мэтай аказання дапамогі бацькам (законным прадстаўнікам) выхаванцаў у выхаванні і развіцці дзяцей у выходныя дні і вячэрні час.
Рэалізацыя зместу адукацыйных абласцей вучэбнай праграмы дашкольнай адукацыі ў групах выхаднога дня ажыццяўляецца як у спецыяльна арганізаванай (гульня, занятак), так і ў нерэгламентаванай дзейнасці.
Пры арганізацыі адукацыйнага працэсу ў вячэрніх групах (напрыклад, з 17.30 да 19.30 - ва ўстановах адукацыі з часам працы 10,5 гадзіны) прыярытэтным відам дзейнасці з'яўляецца гульнявая (сюжэтна-ролевыя, будаўніча-канструктыўныя, рэжысёрскія, тэатралізаваныя, творчыя гульні, гульні-драматызацыі) , гульні з правіламі (рухомыя і дыдактычныя) і інш.). Вячэрнія групы не павінны адкрывацца ўзамен "дзяжурных", арганізацыя якіх ажыццяўляецца ва ўстановах адукацыі з улікам запытаў бацькоў (законных прадстаўнікоў) выхаванцаў, рэжымам работы прадпрыемстваў, размешчаных на тэрыторыі адпаведнай адміністрацыйна-тэрытарыяльнай адзінкі.
разгарнуць » / « згарнуць